Հայաստանի վարչապետ Տիգրան Սարգսյանը մասնակցել է ԱՊՀ անդամ-երկրների մաքսային ծառայությունների ղեկավարների 52-րդ նիստին: «Երևանում նիստը երրորդ անգամ կազմակերպելու փաստն ընդգծում է Հայաստանի շահագրգիռ լինելը տարածաշրջանային համագործակցության ակտիվացման մեջ: ԱՊՀ մաքսային ծառայությունների ղեկավարների խորհրդի գործունեությունն ուղղված է այնպիսի փաստաթղթերի մշակմանը, որոնք նպաստելու են մեր երկրների առևտրատնտեսական պոտենցիալի առավելագույն օգտագործմանը»,- ասել է վարչապետը:
Նա նաև նշել է, որ կարգավորվում է մաքսային խախտումները կանխարգելելու համար գործողությունների անցկացման մեխանիզմը: «Ես համոզված եմ, որ հանցավոր խմբավորումները հիմնականում ստվերային տնտեսություն են ստեղծում: Հաշվի առնելով այդ հանգամանքը, մաքսային ծառայությունների և կոռուպցիայի դեմ պայքարը, մաքսային արժեքը որոշելու և ռիսկերը կառավարելու հետ կապված հարցերը պետք է առաջնային լինեն ԱՊՀ մաքսային ծառայությունների գործունեության մեջ»,- ասել է Սարգսյանը:
ԱՊՀ մաքսային ծառայությունների ղեկավարների խորհուրդը ստեղծվել է 1993-ի դեկտեմբերի 23-ին տնտեսական միություն ստեղծելու մասին համաձայնագրի դրույթներն իրագործելու նպատակով:
