Հայաստանի կառավարությունը նոյեմբերի 4-ի նիստում հաստատել է գյուղի և գյուղատնտեսության 2010-2020թթ. կայուն զարգացման ռազմավարությունը և դրա կատարումն ապահովող միջոցառումների ցանկը։
Բացի դրանից, կառավարությունը հավանություն է տվել «Գյուղատնտեսության տեխնիկական վերազինման և գյուղատնտեսական տեխնիկայի օգտագործման արդյունավետության բարձրացման» հայեցակարգին։
Այս կապակցությամբ ՀՀ վարչապետ Տիգրան Սարգսյանը շնորհակալություն է հայտնել Հանրային խորհրդին և կոոպերատիվների միությանը, որոնք ակտիվորեն մասնակցել են այս փաստաթղթերի ստեղծմանը։ «Առաջին անգամ համալիր մոտեցում է ցուցաբերվում գյուղի մարդկանց կենսապայմաններին, այլ ոչ թե միայն գյուղատնտեսությանը` իբրև տնտեսության ճյուղի»,- ասել է նա:
Ընդ որում, կառավարության ղեկավարն ընդգծել է, որ այս հայեցակարգը կխթանի կոոպերացման շարժումը, տնտեսությունների խոշորացումը: Նրա խոսքով, տեխնիկա մատակարարելիս նախապատվությունը կտրվի այն տնտեսություններին, որոնք համատեղ կշահագործեն տեխնիկան։ «Ջանք կգործադրվի, որպեսզի Հայաստան բերվեն գյուղատնտեսական տեխնիկա արտադրող համաշխարհային անուն ունեցող ընկերություններ, որոնք նաև կսպասարկեն այդ տեխնիկան»,- ավելացրել է Տիգրան Սարգսյանը:
