ԱՄՆ Ներկայացուցիչների պալատի խոսնակ Նենսի Փելոսին լրջորեն մտածում է Պալատում փոքրամասնության առաջնորդ դառնալու մասին: Ըստ ABC-ի, այժմ Նենսի Փելոսին ցանկանում է ստանալ ժողովրդավարների աջակցությունը: Ըստ նրա կուսակիցների, Փելոսին կկարողանա վերականգնել մեծամասնությունը Ներկայացուցիչների պալատում հաջորդ ընտրություններում և նրանից լավ ոչ ոք չի կարող միջոցներ հավաքել ապագա նախընտրական արշավի համար:
Նոյեմբերի 2-ին ԱՄՆ Կոնգրեսի միջանկյալ ընտրություններում հանրապետականները կարողացան մեծամասնություն ստանալ Ներկայացուցիչների պալատում, սակայն Սենատում իրենց դիրքերը ժողովրդավարները պահպանեցին:
Պալատի խոսնակի պաշտոնում Փելոսին հանդես էլ գալիս Հայոց ցեղասպանության մասին 252 բանաձևի ընդունման օգտին: Մինչ 2011թ. հունվարը, երբ կգումարվի 112-րդ Կոնգրեսը, Փելոսին դեռ ժամանակ ունի քվեարկության դնելու համար 2010թ. մարտի 4-ին արտաքին հարաբերությունների կոմիտեում հավանության արժանացած բանաձևը: