Երևանի «Նաիրիտ» քիմիական գործարանի աշխատակիցները բողոքով դիմել են կառավարության ընդունարան, որտեղ նրանց ընդունել է Հայաստանի էներգետիկայի և բնական պաշարների նախարար Արմեն Մովսիսյանը: Ինչպես հաղորդում է PanARMENIAN.Net-ի թղթակիցը կառավարությունից, աշխատողները պահանջում են վճարել աշխատավարձերը, որոնք նրանք չեն ստացել 4 ամիս: Ավելին, հոկտեմբերի 20-ին նրանց ստիպել են փաստաթուղթ ստորագրել այն մասին, որ անորոշ ժամանակով պարապուրդ է լինելու: Արմեն Մովսիսյանը լսել է բողոքները և ասել, որ կառավարությունը կքննարկի այդ հարցը և ոլորտի խնդրի լուծման համար գործողությունների ծրագիր կպատրաստի:
«Երեքշաբթի օրը ժամը 13:00-ին «Նաիրիտ» գործարանի խնդիրներին որոշակի լուծումներ կտրվեն»,- ասել է նախարարը:
«Նաիրիտի» աշխատողներից մեկը հայտարարել է, որ ղեկավարությունը պատճառաբանում է, որ աշխատավարձի ուշացումը և գործարանի պարապուրդը 350 մլն եվրո պարտքի արդյունք է, այդ թվում` գազի և էլեկտրաէներգիայի:
