Հայ ազգային կոնգրեսը դիմել է քաղաքապետարան՝ Ազատության հրապարակում ՀԱԿ հանրահավաք անցկացնելու թույլտվություն ստանալու համար: Այդ մասին Երևանում կայացած մամլո ասուլիսում հայտարարել է ՀԱԿ համակարգող Լևոն Զուրաբյանը: Ըստ նրա, քաղաքապետարանը ոչ մի հիմք չունի մերժելու:

«Համաձայն սույն խնդիրը կարգավորող «Ժողովներ, հանրահավաքներ, երթեր ու ցույցեր անցկացնելու մասին» օրենքի՝ Ազատության հրապարակը չի ընդգրկված այն օբյեկտների շարքում, որտեղ արգելված են զանգվածային հրապարակային միջոցառումները (հոդված 9): Նույն օրենքի համաձայն, քաղաքապետարանը «պարտավոր է առաջարկել զանգվածային հրապարակային միջոցառման անցկացման այլ օրեր և այլ ժամեր» նշված վայրում (հոդված 13.4), ինչն երբեք չի արվել»,-ասել է նա: Նա ընդգծել է, որ եթե ՀԱԿ-ը «նորմալ» պատասխան չստանա, ապա ՀԱԿ-ը մտադիր է դիմել դատարան՝ վիճարկելու համար քաղաքապետարանի որոշումը: «Քաղաքապետարանը պարտավոր է 10 օրվա ընթացքում պատասխանել այս նամակին»,-ասել է նա՝ հավելելով, որ անկախ նրանից, թե ինչպիսին կլինի պատասխանը, ՀԱԿ-ը մտադիր է «գրավել» Ազատության հրապարակը: