«Հայաստան» համահայկական հիմնադրամի ամենամյա հեռուստամարաթոնի շրջանակներում Արցախի Հանրապետության նախագահ Բակո Սահակյանը և Հայաստանի Հանրապետության նախագահ Սերժ Սարգսյանը նոյեմբերի 16-ին ՌԴ մայրաքաղաք Մոսկվայում հանդիպում են ունեցել Ռուսաստանի հայ գործարարների և բարերարների հետ:
Բակո Սահակյանը կարևորել է Ռուսաստանի մեր հայրենակիցների դերակատարությունը Ղարաբաղի զարգացման գործում` ընդգծելով, որ այս անգամ ևս ակնկալում է նրանց ակտիվ մասնակցությունը Արցախի առջև ծառացած կարևորագույն խնդիրներից մեկի` խմելու ջրի հարցի լուծմանը: Արցախի Հանրապետության նախագահի խոսքով, այդ հարցն ունի քաղաքական, տնտեսական ու սոցիալական նշանակություն, և նրա լուծումը մեծապես կնպաստի Արցախի Հանրապետության զորացմանն ու զարգացմանը:
Միջոցառմանը ներկա էին Ռուսաստանի Դաշնության պետական, հասարակական-քաղաքական գործիչներ, հայ համայնքի ներկայացուցիչներ, հայկական երկու պետությունների բարձրաստիճան պաշտոնյաներ, հաղորդում է Արցախի Հանրապետության նախագահի աշխատակազմի տեղեկատվության գլխավոր վարչությունը: