Հայ-թուրքական արձանագրությունները լիովին «վնասազերծելու» համար Հայաստանն անհապաղ պետք է ետ վերցնի իր ստորագրությունը: Այդ մասին Երևանում մամլո ասուլիսում հայտարարել է ՀՅԴ Բյուրոյի Հայ դատի եւ քաղաքական հարցերի պատասխանատու Կիրո Մանոյանը: Նրա խոսքերով, ներկա իրավիճակում Թուրքիան Հայաստանի վրա ճնշում գործադրելու բոլոր լծակներն ունի:
Խոսելով ղարաբաղյան կարգավորման մասին` Մանոյանը հայտարարել է, որ ՀՅ Դաշնակցության համար ընդունելի են հակամարտության կարգավորման երեք հիմնական սկզբունքները, բայց անընդունելի են այդ սկզբունքներից բխող հետագա գործողությունները: «Այսօրվա Ղարաբաղը ԼՂԻՄ-ը չէ: Ղարաբաղը երկու անգամ արդեն արտահայտել է իր կամքը: Ադրբեջանը պարտվել է իր իսկ կողմից սանձազերծած պատերազմում, և հայկական կողմը պարտավոր չէ ինչ-որ բան փոխհատուցել»,- ասել է Մանոյանը:
Նրա կարծիքով, Աստանայում առաջընթաց ակնկալելու լուրջ հիմքեր չկան, իսկ Բաքվի հայտարարությունները ճանապարհային քարտեզի հնարավոր ստորագրման մասին պետք է դիտարկել հայ-ադրբեջանական պատերազմի համատեքստում:
