«Այսօր նոր պայմաններում մեր մայրաքաղաքում ծավալվող ակտիվ քաղաքաշինությունը հաշվի չի առնում աշխարհի այլ մեգապոլիսների փորձն ու սխալները: Բացի դրանից, սխալ քաղաքաշինությունը հանգեցնում է մի շարք բնապահպանական խնդիրների առաջացման»,- դեկտեմբերի 7-ին «Մայրաքաղաքների բնապահպանությունը` մեգապոլիսի խնդիրները» խորագրով Մոսկվա-Երևան հեռուստակամրջի ընթացքում հայտնեց բնապահպան, Հայաստանի բնապահպանության նախկին նախարար, «Հանուն մարդկային կայուն զարգացման» ընկերակցություն» հասարակական կազմակերպության նախագահ Կարինե Դանիելյանը:
Նրա կարծիքով, «կետային» շինարարությունը (նոր շենքերի կամ կառույցների շինարարություն պատմականորեն ձևավորված բնակելի թաղամասում` սովորաբար կանաչ գոտիների տեղում) բացարձակապես անընդունելի է քաղաքաշինության մեջ:
«Գոյություն ունի կայուն քաղաքների դրական փորձը, որն անհրաժեշտ է փոխ առնել, ինչը մենք չենք անում: Դրա փոխարեն մենք թույլ ենք տալիս սխալներ, որոնք համաշխարհային քաղաքաշինության պատմության մեջ արդեն վաղուց հայտնի են, իսկ մենք դասեր չենք քաղում այդ փորձից»,- նշեց Դանիելյանը:
