«Մենք նախատեսում ենք բազմաթիվ միջոցառումներ կազմակերպել միջազգային կազմակերպությունների, բանկերի և ՀԲ-ի հետ համատեղ, նախատեսվում է պետական և մասնավոր ծրագրերի իրականացում, ինչպես նաև կյանքի կկոչվի գործազրկության մակարդակի նվազեցման ՄԱԿ-ի ծրագիրը»,-դեկտեմբերի 14-ին Երևանում կայացած մամլո ասուլիսում հայտարարել է «Զբաղվածության պետական ծառայություն» գործակալության պետ Սոնա Հարությունյանը: Նա նշել է, որ զբաղվածության կարգավորման պետական ծրագրով դեկտեմբերի 1-ի դրությամբ իրականացվել են տարբեր ծրագրեր: «Անմրցունակ անձանց աշխատանքի տեղավորելու դեպքում աշխատավարձի մասնակի փոխհատուցում գործատուին» ծրագրով աշխատանքի է տեղավորվել 80 հաշմանդամ»,-ասել է Հարությունյանը:
Նա նաև հավելել է, որ տարեսկզբից վեց «Աշխատանքի տոնավաճառների» արդյունքում, որոնք անցել են Գավառում, Վանաձորում, Իջևանում, Գյումրիում, Աբովյանում ու Երևանում, շուրջ 450 գործազուրկ ընդունվել է աշխատանքի:
