2010 թվականը Հայաստանի համար բավականին բարդ տարի էր: Այդ մասին Երևանում կայացած մամլո ասուլիսում հայտարարել է Հայաստանի Ազգային ժողովի խորհրադարանական խմբակցության անդամ Կարինե Աճեմյանը: Ըստ նրա, համաշխարհային ֆինանսական ճգնաժամը չէր կարող բացասական ազդեցություն չունենալ երկրի վրա: Սակայն, Աճեմյանը նշել է, որ Հայաստանի կառավարությունը կարողացավ հաղթահարել բոլոր դժվարությունները և նույնիսկ 2,6 տոկոս տնտեսական աճ ապահովել:
Նա նաև բարձր է գհահատել ՀՀ նախագահ Սերժ Սարգսյանի վերջին ելույթը ՀՀԿ հոբելյանական նիստում՝ նշելով, որ իր ելույթում նախագահն անդրադարձավ բոլոր առկա խնդիրներին և անելիքներին:
Խոսելով մշակութային ոլորտի մասին՝ Աճեմյանը նշեց, որ 2010թ. բավականին ակտիվ էր այդ առումով: Գլխավոր նվաճումը նա համարեց այն, որ ՅՈՒՆԵՍԿՕ-ի ոչ նյութական մշակութային ժառանգության կոմիտեն նոյեմբերի 17-ին խաչքարերն ու խաչքարագործությունն ընդգրկեց իր ցուցակում:
Անդրադառնալով ղարաբաղյան հակամարտությանը՝ նա նշել է, որ այս հարցի շուրջ իրավունք ունեն խոսելու միայն այն մարդիկ, որոնք այցելել են Արցախ և տեղյակ են վերջին զարգացումներին: Ըստ Աճեմյանի, նա հաճախ է լինում Արցախում: Նա նաև քննադատել է այն մարդկանց, որոնք ապատեղեկատվություն են տարածում բանակում տեղի ունեցած միջադեպերի վերաբերյալ՝ ասելով, որ դա բնորոշ է մեր հակառակորդ Ադրբեջանին, ոչ թե Հայաստանին: Նա նշել է նաև, որ ԼՂՀ պաշտպանության բանակը միանգամայն մարտունակ է:
Անդրադառնալով կառավարությունում կատարված կադրային փոփոխություններին, նա ասել է, որ փոփոխությունները սպասված էին: Ըստ նրա, երկիրը այդ ճանապարհով պետք է առաջ շարժվի: Կարինե Աճեմյանը բարձր է գնահատել նախագահի որոշումը կադրային փոփոխությունների վերաբերյալ:
