Այն, ինչ ասում է Թուրքիայի արտգործնախարար Ահմեդ Դավութօղլուն, պարզապես քաղաքական ճարտասանություն է այն գծով, որին նա հավատարիմ է: Այդ մասին PanARMENIAN.Net-ի թղթակցի հետ զրույցում ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը: Նա հիշեցրեց, որ իշխող «Արդարության և զարգացման» կուսակցությունից Դավութօղլուի քաղաքականությունը հիմնված է «զրո խնդիր հարևանների հետ» սկզբունքի վրա: «Իսկ այն, որ նա ասում է, թե Հայաստանն ու Թուրքիան ոչ թե թշնամիներ են, այլ պոտենցիալ բարեկամներ, պարզապես խոսքեր են, որոնք կոչված են մեծացնել Թուրքիայի ազդեցությունը սահմանակից երկրների վրա: Նման հռետորականությունը նրա շուրթերից հնչում է ոչ միայն Հայաստանի հասցեին»,- նկատեց Իսկանդարյանը: