Ոչ մի հիմք չկա ենթադրելու, որ ղարաբաղյան հակամարտության կարգավորումը կարագանա: Իրավիճակը կմնա այնպիսին, ինչպիսին եղել է: Այդ մասին PanARMENIAN.Net-ի թղթակցի հետ զրույցում հայտարարել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը` մեկնաբանելով Մյունխենում ՀՀ նախագահ Սերժ Սարգսյանի հանդիպումը ԱՄՆ պետքարտուղար Հիլարի Քլինթոնի հետ: «Հակամարտության նկատմամբ գերտերությունների որոշակի ուշադրությունը նորություն չէ և գործում է 1992-ից: Ես կասեի, որ վերջին տարիներին ԱՄՆ և ԵՄ կողմից հակամարտության հետ կապված մտահոգությունը նվազել է, այլ ոչ թե ավելացել: Դրա պատճառը քաղաքական գործիչների կողմից այն բանի գիտակցությունն է, որ անհնար է լուծել հակամարտությունը: Համաշխարհային հանրության խնդիրն է պահպանել հակամարտությունն իր ներկա վիճակում»,- ասել է հայ փորձագետը:
