Փետրվարի 8-10 Բյուրեղավանում անցնում է Հայաստանի սուսերամարտիկ երիտասարդական առաջնությունը, որին մասնակցում են 140 մարզիկներ Երևանից, Գյումրիից, Վանաձորից և Բյուրեղավանից:
Առաջին մեդալները խաղարկվեցին «ճկասուսեր» մարզաձևում, որտեղ հաղթող դարձավ Արմենակ Գասպարյանը, որը եզրափակչում հաղթեց Էմիլ Դանիելյանին: Երրորդ տեղերը գրավեցին Գևորգ Հարությունյանն ու Մայքլ Հովհաննիսյանը, PanARMENIAN.Net-ի թղթակցին է հայտնել Հայաստանի սուսերամարտի ֆեդերացիայի գլխավոր քարտուղար Արտաշես Մադոյանը:
Երկրորդ մրցաշարային օրը հայտնի կդառնան հաղթողները պատանիների և աղջիկների շրջանում «խոցասուսեր» մարզաձևում: Առաջնության ավարտի արդյունքում կձևավորվեն Հայաստանի հավաքականները, և մարտի 26-ին պատանի սուսերմարտիկները Լեհաստանում կմասնակցեն միջազգային մրցաշարի, իսկ երիտասարդները՝ ապրիլին կմասնակցեն Հորդանանում կայանալիք աշխարհի առաջնությանը: