ՀՀ գյուղատնտեսության նախարար Սերգո Կարապետյանն ընդունեց ՄԱԿ-ի Պարենի և գյուղատնտեսության կազմակերպության (ՊԳԿ) Կենտրոնական և Արևելյան Եվրոպայի ենթատարածաշրջանային համակարգող, Հայաստանում ՊԳԿ-ի ներկայացուցիչ Յուտտա Կրաուզեին: Տիկին Կրաուզեն նախարարին հանձնեց իր հավատարմագրերի պատճենները:
Նախարարը նշեց, որ ՀՀ գյուղատնտեսության նախարարության և ՊԳԿ-ի միջև համագործակցության արդյունքում իրականացվել և իրականացվում են գյուղատնտեսության ոլորտի զարգացմանը նպաստող բազմաթիվ ծրագրեր: Նախարարը համոզմունք հայտնեց, որ տիկին Կրաուզեի պաշտոնավարման շրջանում ՀՀ համագործակցությունը ՊԳԿ-ի հետ նոր դրական լիցքեր կստանա:
Հանդիպման ընթացքում քննարկվեցին Հայաստանում ՊԳԿ-ի կողմից իրականացվող ծրագրերի տարածաշրջանային, տեխնիկական աջակցության, ինչպես նաև դոնորական աջակցությամբ ՊԳԿ-ի կողմից Հայաստանում իրականացվող ծրագրերի մանրամասները: Կողմերն անդրադարձան նաև ՊԳԿ-ՀՀ համագործակցությանը նվիրված 2011-2015 թթ. ազգային առաջնահերթությունների շրջանակին:
