Միջազգային գործերի ու անվտանգության քաղաքականության գծով Եվրամիության ներկայացուցիչ Քեթրին Էշթոնը ափսոսանք է հայտնել, որ Եգիպտոսի նախագահ Հոսնի Մուբարաքը, հրաժարվելով հեռանալ նախագահի պաշտոնից, ճանապարհ չբացեց առավել արագ ու խորը բարեփոխումների համար:
«Եկել է փոփոխությունների պահը: Մենք ուշադիր կհետևենք Եգիպտոսի ժողովրդի արձագանքին առաջիկա ժամերին ու օրերին»,-հայտարարել է Էշթոնը՝ նշելով, որ ԵՄ-ն կպահպանի շփումը եգիպտոսի իշխանությունների հետ՝ նպատակ ունենալով համոզել նրանց, որ հարկավոր է ապահովել կանոնակարգված, խելամիտ ու տևական անցում ժողովրդավարությանը, հաղորդում է AFP-ն:
Հինգշաբթի երեկոյան Մուբարաքն իր հեռուստաելույթում հայտարարեց, որ «իր լիազորությունները փոխանցում է փոխնախագահին՝ պահպանելով իր պաշտոնը մինչ սեպտեմբերին կայանալիք նախագահական ընտրությունները»:
Իշխող ռեժիմի դեմ ցույցերն Եգիպտոսում շարունակվում են հունվարի 25-ից: Անկարգությունների արդյունքում զոհվել է 300 մարդ, շուրջ 5 հազարը վիրավորվել են: