Փետրվարի 11-ին Հայաստանի Նկարիչների միությունում տեղի ունեցավ ՀՀ մշակույթի նախարարության նախաձեռնությամբ և «Էքսպոմեդիա» կենտրոնի կողմից կազմակերպված «ART EXPO-2011» արվեստների ցուցահանդեսի բացումը:
Ցուցահանդեսում «Հայփոստը» ներկայացել էր վերջին տարիների ֆիլատելիստական արտադրանքով: Ինչպես հաղորդում է ընկերության մամլո ծառայությունը, «Հայփոստի» տաղավարում ցուցադրված էին ինչպես 1992 թվականից ի վեր թողարկված բոլոր հայկական նամականիշերի հավաքածուն, այնպես էլ 2009 և 2010 թվականների նամականիշերի բոլոր թեմատիկ թողարկումները և հավաքածուները, թեմատիկ բացիկներ, առաջին օրվա ծրարներ:
«Հայփոստի» տաղավարն առաջացրեց ոչ միայն ֆիլատելիստների, այլև «ART EXPO-2011» ցուցահանդեսի բոլոր այցելուների հետաքրքրությունը»,- նշվում է հաղորդագրության մեջ:
Վերջին շրջանի հայկական ֆիլատելիայի թեմատիկան բազմաբնույթ է. ֆլորա և ֆաունա, անվանի դեմքեր, պատմական մայրաքաղաքներ, եկեղեցիներ, սպորտ, ևն:
«ART EXPO-2011» ցուցահանդեսում ավելի քան 50 կազմակերպություններ ներկայացրեցին 2010 թվականի լավագույն աշխատանքները:
