«Բարգավաճ Հայաստանը» քաղաքական պայքարի քաղաքակիրթ մեթոդների, երկխոսության ու փոխզիջման կողմից է: Այդ մասին «Բարգավաճ Հայաստան» կուսակցության V համագումարի շրջանակներում իր ելույթում հայտնել է կուսակցության առաջնորդ Գագիկ Ծառուկյանը: Նա ավելացրել է, որ կուսակցությունը հավատարիմ է ժողովրդավարական սկզբունքներին և վստահ է իր ուժերի մեջ, պատրաստ է քաղաքակիրթ պայքարին ու ազատ մրցակցությանը:
«Բարգավաճ Հայաստանի» ղեկավարն ընդգծել է, որ ընտրությունները պետք է միավորեն, այլ ոչ թե պառակտեն հասարակությունը, և ընթանան բացառապես խաղի ժողովրդավարական կանոնների համաձայն: Նա նշել է, որ վերջին տարիներին ընտրությունները, նախընտրական կրքերն ու հետընտրական գործընթացները շատ ցավոտ են ընթացել Հայաստանում, իսկ քաղաքական պայքարը դուրս է եկել թույլատրելիի սահմանից:
Գագիկ Ծառուկյանն ավելացրել է, որ «Բարգավաճ Հայաստանը» պատրաստ է առաջիկա ընտրություններին և վստահ է իր ուժերի մեջ:
