Մասաչուսեթս նահանգի Բելմոնթ համալսարանում տեղի է ունեցել պրոֆեսոր Ջորջ Բուրնուտյանի «Առաքել Դավրիժեցու «Գիրք պատմութեանց». վկայություններ 17-րդ դարի Հայաստանի մասին» դասախոսությունը: Դա պատմական մեծ աշխատության առաջին թարգմանությունն է անգլերեն լեզվով, որը հրատարակվել է Mazda Publishers-ում:

Առաքել Դավրիժեցի (մոտ 1590, Թավրիզ – 1670, Վաղարշապատ), պատմագիր, եկեղեցական գործիչ: 1651–62թթ. ընթացքում Փիլիպոս Ա կաթողիկոսի հանձնարարությամբ գրել է «Պատմութիւն» («Գիրք պատմութեանց», «Պատմագիրք») աշխատությունը, որտեղ մանրամասն նկարագրել է իր ապրած ժամանակների եղելությունները, անդրադարձել Հայաստանի տնտեսական ու քաղաքական կացությանը, պարսկա-օսմանյան պատերազմների պատմությանը, ջալալիների շարժմանը:

«Պատմութիւնը» արժեքավոր աղբյուր է հայկական գաղթավայրերի պատմության ուսումնասիրության համար, եզակի են Լվովի հայերի ներքին կյանքի, ինքնավարության, դատավարության, կենցաղի, Նոր Ջուղայի հիմնադրման ու ծաղկման, արհեստների, առևտրի զարգացման վերաբերյալ տեղեկությունները: «Պատմութիւնը» առաջին անգամ լույս է տեսել դեռևս հեղինակի կենդանության օրոք՝ 1669-ին, Ամստերդամում, Ոսկան Երևանցու աշխատասիրությամբ: 1990թ. լույս է տեսել երկի քննական հրատարակությունը: Գիրքը թարգմանվել է ֆրանսերեն (1874), ռուսերեն (1973), լեհերեն (1981), հատվածաբար՝ վրացերեն (1974): Պրոֆեսոր Բուրնուտյանը հայոց պատմության մի շարք գրքերի հեղինակ է և թարգմանիչ, դասավանդում է պատմություն Կոլումբիական համալսարանում, Տաֆտայի, Քոնեքթիքութի և Կալիֆորնիայի համալսրաններում, գրում է wickedlocal.com-ը: