Փետրվարի 24-ին Հայաստանի արտաքին գործերի նախարարի տեղակալ Շավարշ Քոչարյանն ընդունեց հակամարտությունների հարցերով ԵԱՀԿ գործող նախագահի հատուկ ներկայացուցիչ, դեսպան Գիեդրիուս Չեկուոլիսին: Հանդիպման ընթացքում քննարկվեցին ԵԱՀԿ գործող նախագահ, Լիտվայի արտաքին գործերի նախարար Աուդրոնիուս Աժուբալիսի գլխավորած պատվիրակության` Հայաստան կատարելիք այցի մանրամասները:
Փոխնախարար Քոչարյանը դեսպան Չեկուոլիսին ներկայացրեց ԼՂ հիմնախնդրի խաղաղ կարգավորման ներկա փուլի մանրամասները, բանակցային գործընթացի վերաբերյալ ՀՀ մոտեցումները, ինչպես նաև ընդգծեց Լեռնային Ղարաբաղի մոտեցումներին անմիջական շփումներով տեղեկանալու կարևորությունը:
Հանդիպման ընթացքում կարծիքներ փոխանակվեցին Լեռնային Ղարաբաղի հակամարտության կարգավորման հարցում փոխվստահության մթնոլորտի ձևավորման և այդ ուղղությամբ առկա մեխանիզմների ամրապնդման և միջոցառումների իրականացման վերաբերյալ, հաղորդում է ՀՀ ԱԳՆ մամուլի, տեղեկատվության և հասարակայնության հետ կապի վարչությունը:
