Միջազգային պրակտիկայում բոլոր պայմանագրերը, համաձայնագրերը, որոնցում խոսվում է երկրների տարածքային ամբողջականության մասին, անմիջականորեն վերաբերվում են ուժի կիրառմանը: Այդ մասին Երևանում «Արցախ. թագավորությունից հանրապետություն» քննարկման ընթացքում հայտարարել է իրավաբան, Վաշինգտոնի իրավաբանական քոլեջի մագիստրոս Լևոն Գևորգյանը: Խոսելով Արցախի Հանրապետության անկախության հռչակագրի մասին` նա ուշադրություն է դարձրել նրան, որ ՄԱԿ Անվտանգության խորհուրդը 1990-ականներին ընդունած Ղարաբաղի մասին բանաձևերում չի նշել, որ այդ հռչակագիրն անօրինական է: «Հայկական դիվանագիտությունը պետք է հատուկ շեշտադրի այդ փաստը: Անհրաժեշտ է ամեն կերպ ապացուցել, որ Ղարաբաղի անկախության հռչակումը համապատասխանել է միջազգային իրավունքի նորմներին»,- ասել է փորձագետը: