Կանանց օրվա առիթով Ծայրագույն Պատրիարք եւ Ամենայն Հայոց կաթողիկոս Գարեգին Երկրորդը շնորհավորական ուղերձ է հղել Մայր Աթոռ Սուրբ Էջմիածնից, որում ասվում է.«Մայր Աթոռ Սուրբ Էջմիածնից Հայրապետական Մեր օրհնությունն ու շնորհավորանքներն ենք բերում տիկնանց և օրիորդաց Կանանց տոնի` մարտի 8-ի առիթով»:
«Այսօր բոլոր ասպարեզներում իրենց գործունեությամբ ու գովարժան ձեռքբերումներով, իրենց նվիրումով ու նախանձախնդրությամբ կանայք առատացնում են խնամքն ու հոգածությունը մեր կյանքում, նպաստ բերում Հայրենիքի շենացմանը, ազային ու մշակութային մեր կյանքի առաջընթացին:
Արդարև, համազգային մեր կյանքում բացառիկ է լուսերամ հայ կնոջ առաքինազարդ նկարագիրը և հավետ օրհնյալ է նրա առաքելությունը` լինել խարիսխը հայ ընտանիքի, խտացումը սիրո, հավատարմության ու անձնուրաց նվիրումի:
Աղոթում ենք առ Աստված և մաղթում, որ գարնանաշունչ այս ուրախաբեր տոնը բերկրանք և ջերմություն բերի համայն տիկնանց ու օրիորդաց սրտերին, և Աստծո Ամենախնամ Սուրբ Աջը օրհնի և շնորհազարդի նրանց կյանքը բարիքներով, խնդությամբ« որպեսզի խաղաղության մեջ, առ Աստված հավատով ու հույսով, հայրենի սուրբ ավանդներով մեծացնեն, կրթեն ու դաստիարակեն մեր զավակներին` ի բարօրություն հայրենական կյանքի շինության ու զարգացման»,-ասվում է Ամենայն Հայոց կաթողիկոսի ուղերձում: