Արմավիր քաղաքում քաղաքապետի ընտրություններն անցան, ինչպես և սպասելի էր, վարչախմբի չգրված օրենքների շրջանակներում։ Այդ մասին հայտնել է ընդդիմադիր Հայ ազգային կոնգրեսը` մեկնաբանելով Արմավիրի քաղաքապետի ընտրությունների ժամանակ տեղ գտած խախտումները: «Հօգուտ հանրապետական գործող քաղաքապետի կատարված համատարած խախտումները և կիրառված բռնությունները միայն լուծեցին վերևից իջած հրահանգի կատարումը` թե ով պետք է դառնա քաղաքապետ։ Խնդիրը լուծվել է վերջին ժամերին ոստիկանության միջամտությամբ, ամեն տեղամասում ցույց տալով րոպեում 2 քվեարկություն։ Հենց դրա դեմ էլ ծառացավ հասարակական ընդվզումը, որին մասնակցեցին հարյուրավոր մարդիկ` որպես բողոքի հուսահատ քայլ փակելով մայրուղին։ Բողոքի ակցիան ցրվել է Երևանից բերված ոստիկանական ուժերի կողմից` բռնի մեթոդներով, շատերը ֆիզիկապես տուժել են և բերման ենթարկվել ոստիկանական բաժին»,- ասվում է ՀԱԿ հայտարարության մեջ:
Հայ Ազգային Կոնգրեսը, դատապարտելով վարչախմբի հերթական ապօրինությունները և բռնարարքները, իր զորակցություն է հայտնում ոստիկանական գործողություններից տուժածներին, ինչպես նաև իր պատրաստակամությունը հայտնում նրանց իրավական օգնություն ցույց տալու հարցում։ «Իսկ օրինական ընտրության հնարավորություն, ինչպես բազմիցս համոզվել ենք, կստանանք միայն վարչախմբի հեռացումով, ինչի նախաշեմին ենք հասել Հայ Ազգային Կոնգրեսի եռամյա համառ պայքարի շնորհիվ»,- ընդգծվում է Կոնգրեսի հայտարարության մեջ:
