ԵԱՀԿ և Եվրոպայի բարձրաստիճան պաշտոնյաների խորհուրդները ղարաբաղյան հակամարտության կարգավորման հարցում վկայում են այն մասին, որ նրանք պատկերացնում չունեն մեր իրականության մասին և չեն հասկանում, թե ինչ է իրենից այսօր ներկայացնում ղարաբաղյան հիմնահարցը: Այդ մասին Երևանում մամլո ասուլիսում հայտարարել է ռազմական փորձագետ Արծրուն Հովհաննիսյանը` մեկնաբանելով այն, որ ԵԱՀԿ գործող նախագահ Աուդրոնյուս Աժուբալիսն առաջարկել է հայկական կողմին միակողմանի կարգով հեռացնել դիպուկահարներն Արցախի և Ադրբեջանի զինված ուժերի շփման գծից:
Իր հերթին, քաղաքագետ Հրանտ Մելիք-Շահնազարյանն ասել է, որ ԵԱՀԿ-ն և այլ միջազգային կառույցները ղարաբաղյան հակամարտության մեջ նպատակ ունեն ցույց տալ թեկուզ ինչ-որ արդյունք: Նրա խոսքերով, եթե նրանց հաջողվի զորքերի շփման գծից հեռացնել թեկուզ մեկ զինվորի, ապա դա կներկայացվի որպես լուրջ ձեռքբերում: Նա նշել է, որ հայկական կողմը չի կարող գնալ նման քայլի և հեռացնել իր դիպուկահարներին, քանի որ հենց նրանք են օգնում բացահայտել հակառակորդի դիպուկահարներին, որոնք փորձում են սպանել հայ զինվորներին: