Հայաստան-Ռուսաստան ֆուտբոլային հանդիպման երկրորդ խաղակեսի սկզբում Վարդան Մինասյանը կիսապաշտպան Էդգար Մալաքյանին փոխարինեց հարձակվող Էդգար Մանուչարյանով:

Ռուսաստանի հավաքականի դարպասի մոտ ամենավտանգավոր պահը ստեղծվեց 52-րդ րոպեին, երբ գնդակը շատ փոքր շեղությամբ անցավ դարպասաձողի կողքով, և երկրպագուների մեծ մասն արդեն պատրաստ էր «գոլ» գոչել:

57-րդ րոպեին Մարկոս Պիզելիին փոխարինման դուրս եկավ Արթուր Եդիգարյանը, ով շատ արագ մտավ խաղի մեջ, սակայն նրա հարվածը ձախ կիսադաշտից ճշգրիտ չէր: Մինասյանն արդեն 3 փոխարինում էր կատարել, երբ Ադվոկատը դեռ ոչ մի հատ չէր արել. Արտակ Եդիգարյանը փոխարինեց Լևոն Հայրապետյանին:

Հայկական դարպասի մոտ վտանգավոր պահերի հեղինակներ դարձան Սեգեյ Իգնաշևիչը և Ալեքսանդր Կերժակովը: Բերեզովսկին ողջ խաղի ընթացքում բարձունքի վրա էր:

Ադվոկատն առաջին փոխարինումը կատարեց 78-րդ րոպեին, հզորացնելով հարձակումը` դաշտ հանելով Պավել Պոգրեբնյակին: Հայկական հավաքականի երկրորդ դեղին քարտը այսօր վաստակեց Էդգար Մանուչարյանը: Խաղի վերջին րոպեներին Անդրեյ Արշավինին փոխարինեց Դինիյար Բելյալետդինովը և խաղը շարունակվեց մինչև վերջին վայրկյանը փոխադարձ գրոհներով:

Արդյունքում խաղն ավարտվեց 0:0 և Ռուսաստանը 10 միավորով շարունակում է գլխավորել B խումբը: Հայաստանի հավաքականը ժամանակավոր հայտնվեց խմբի 2-րդ տեղում` 8 միավորով:

B խմբի մյուս երկու հանդիպումները կկայանան մարտի 26-ին երևանյան ժամով 23:00 և 23:30: Անդորան կհյուրընկալի Սլովակիային, իսկ Մակեդոնիան խաղ կանցկացնի Իրլանդիայում: Սլովակներն ու իրլանդացիները 7 միավոր ունեն: