«Սարդարապատ» շարժումը հասնելու է Հայաստանում իշխանափոխության, սակայն առանց հերթական կամ արտահերթ ընտրություններին մասնակցելու, այլ «ուղիղ» ժողովրդավարության ճանապարհով, Երևանում մամլո ասուլիսում հայտարարել է «Սարդարապատ» շարժման անդամ, ռեժիսոր Տիգրան Խզմալյանը: «Բնականաբար, մենք չենք մասնակցելու ընտրություններին»,- ասել է նա: Նա նաև հավելել է, որ «Սարդարապատը» Հայաստանի ներկա իշխանությունը բռնապետություն է համարում, իսկ բռնապետերն իշխանության գլուխ են գալիս ոչ ընտրությունների միջոցով և «հեռանում են բնականաբար ոչ ընտրությունների ճանապարհով», նշելով, որ «գլխավոր է` ոչ թե ինչպես են քվեարկում, այլ ով է հաշվում»:
Խզմալյանի խոսքերով, աշխարհը հիմա ապրում է հեղափոխական փոփոխությունների շրջան, որի վկան են արաբական երկրները: Միաժամանակ, նա նշել է, որ հայ ժողովուրդը նախօրոք պետք է մտածի գործողությունների հետագա պլան, և «Սարդարապատը» կգործի հենց այդպես:
