«Արմավիա» ավիաընկերության մամուլի քարտուղար Նանա Ավետիսովան երեկ վերստին հերքեց միանգամից մի քանի թերթերում Միխայիլ Բաղդասարովի բիզնես գործունեության վերաբերյալ տարածված «տեղեկությունները»:
Ինչպես հայտնում է «Հայոց աշխարհը», անդրադառնալով նշված «լուրերին», «Արմավիայի» ներկայացուցիչը հայտնել է, որ ավիաընկերությունը հերքում է լուրերն այն մասին, թե ընկերության սեփականատեր Միխայիլ Բաղդասարովը օդանավակայան է ձեռք բերել Սլովակիայում: «Պարոն Բաղդասարովը ոչ մի օդանավակայան չի գնել։ Որոշ թերթերում հրապարակված այդ տեղեկությունը կեղծ է»,- ասաց մամուլի քարտուղարը:
Ի դեպ, թերթերից մեկն էլ վերստին գրել էր, թե Մ.Բաղդասարովն ուզում է վաճառել կամ նրանից ուզում են գնել «Արմավիան»։ Հերթական անգամ պարզվեց, որ դա էլ է սուտ։
Ինչպես սուտ է այն, որ ազգային ավիափոխադրողը, իբր, վերջին շրջանում ուշացնում է աշխատավարձի վճարումը։ «Ընկերության ոչ մի աշխատակցի աշխատավարձ չի ուշացվել: Եթե թերթը նման տեղեկություն է հրապարակել, ապա թող օգնի մեզ պարզել` հատկապես ո՞ւմ աշխատավարձն է ուշացվել` ո՛ր բորտ-ուղեկցորդուհու, ո՛ր օդաչուի կամ այլ աշխատակցի, որպեսզի կողմնորոշվենք: Վստահեցնում եմ, որ մեր աշխատակիցները ժամանակին են ստանում իրենց աշխատավարձը»,- շեշտեց Նանա Ավետիսովան: