Ապրիլի 26-ին ՀՀ սփյուռքի նախարար Հրանուշ Հակոբյանն ընդունեց Հայաստանի Հանրապետությունում Բրազիլիայի Դաշնային Հանրապետության արտակարգ և լիազոր դեսպան Մարսելա Մարիա Նիկոդեմոսին և դեսպանության մշակութային կցորդ Ֆլորիանո Ռեգիսին:
Ողջունելով հյուրերին` Հ.Հակոբյանը ներկայացրեց ՀՀ սփյուռքի նախարարության առաջիկա ծրագրերը: Անդրադարձ կատարվեց Բրազիլիայի հայ համայնքի հիմնախնդիրներին:
Ներկաները քննարկեցին ՀՀ սփյուռքի նախարարության և Հայաստանում Բրազիլիայի դեսպանության համատեղ ջանքերով իրականացվելիք «Հայերի հետքերը Բրազիլիայում» ծրագիրը:
Ծրագրի շրջանակներում սեպտեմբերին Հայաստանի ազգային պատկերասրահում Հայաստանի Հանրապետության անկախության 20-ամյակի և Բրազիլիայի Դաշնային Հանրապետության անկախության օրվա առթիվ նախատեսվում է կազմակերպել բրազիլահայ նկարիչների ստեղծագործությունների ցուցահանդես` «Հայերի հետքերը Բրազիլիայում» խորագրով:
Դեսպան Մ.Նիկոդեմոսը նախարար Հ.Հակոբյանին տեղեկացրեց, որ Բրազիլիա կատարելիք առաջիկա այցի ընթացքում նախատեսում է հանդիպել հայ համայնքի ներկայացուցիչներին, ծանոթանալ նրանց հիմնախնդիրներին:
Հանդիպման ընթացքում անդրադարձ կատարվեց նաև Սան Պաուլոյի հայագիտական կենտրոնին, որին աջակցում է ՀՀ սփյուռքի նախարարությունը: