Իրանի խորհրդարանում նախապատրաստվում է երկրի նախագահ Մահմուդ Ահմադինեժադի դեմ իմպիչմենտը: Ինչպես հայտնում է The Guardian-ը, նախագահի պաշտոնանկության պատճառ կարող են հանդիսանալ նրա տարաձայնությունները Իրանի գերագույն առաջնորդ Ալի Համենեիի հետ:
Տարաձայնությունների ևս մեկ վկայություն է ԱԳ նախարար Մանուչեհր Մոթթակիի պաշտոնանկությունը, որի մասին որոշումն Ահմադինեժադը կայացրեց 2010թ. դեկտեմբերին առանց գերագույն ղեկավարությանն իրազեկելու: ԱԳՆ նոր ղեկավար դարձավ Ալի Ակբար Սալեհին՝ Իրանի ատոմային էներգիայի կազմակերպության նախկին ղեկավարը:
Չնայած նրան, որ Իրանի նախագահը պետության պաշտոնական ղեկավարն է, գերագույն առաջնորդը դե-ֆակտո լիազորությունների ավելի լայն շրջան ունի: Մեկնաբանելով վերջին իրադարձությունները՝ ընդդիմության ներկայացուցիչներն ենթադրել են, որ նման իրավիճակն այլևս չի գոհացնում Ահմադինեժադին:
