Ապրիլի 29-ին «Հույսի կամուրջ» և «Առաքելություն արևելք» կազմակերպությունները կկազմակերպեն «Կրթություն, աշխատանք, արժանապատիվ կյանք» խորագրով ակցիա, նվիրված հաշմանդամություն ունեցող անձանց իրավունքների պաշտպանությանը:
Ակցիան կմեկնարկի խաղաղ երթով, որին կմասնակցեն հաշմանդամ և ոչ հաշմանդամ մարդիկ Երևանից և հանրապետության մարզերից: Այն սկիզբ կառնի 13:00-ին Առնո Բաբաջանյանի արձանի մոտից և կավարտվի Գաֆեսճյան քանդակների պարտեզում (Կասկադ համալիր), որտեղ տեղի կունենա բացօթյա համերգ` հայտնի երգիչ-երգչուհիների մասնակցությամբ:
Համերգը կազմակերպվում է Գաֆեսճյան արվեստի կենտրոնի աջակցությամբ:
Համերգի ընթացքում կկայանա հաշմանդամություն ունեցող անձանց աշխատանքով ապահոված գործատուների մրցանակաբաշխությունը, որը կազմակերպվում է ՀՀ աշխատանքի և սոցիալական հարցերի նախարարության հետ համատեղ: Միջոցառմանը կցուցադրվեն նաև Հաշմանդամություն ունեցող անձանց իրավունքների մասին ՄԱԿ-ի կոնվենցիային նվիրված սոցիալական տեսահոլովակները:
Ակցիան իրականացվում է Դանիայի միջազգային զարգացման գործակալության ֆինանսական աջակցությամբ: