Հայաստանի ատոմային էլեկտրակայանի անվտանգության մակարդակը մի քանի անգամ բարձր է ճապոնական «Ֆուկուսիմայի» մակարդակից: Այդ մասին, ելույթ ունենալով Հայաստանի խորհրդարանում կառավարական ժամի ընթացքում, հայտնել է Հայաստանի էներգետիկայի և բնական ռեսուրսների նախարար Արմեն Մովսեսյանը` մեկնաբանելով վերջերս լրատվամիջոցներում խմորվող հաղորդագրությունները Մեծամորի ԱԷԿ-ի անվտանգության վերաբերյալ:
«Հայաստանի ԱԷԿ-ն աշխարհում միակ ատոմակայանն է, որը բնական շրջանառության ռեժիմ ունի, ինչը թույլ է տալիս անհրաժեշտության դեպքում անգամ առանց հարկադրական շրջանառության ապահովել ռեակտորի սառեցումը 72 ժամվա ընթացքում»,- ասել է նախարարը: Արմեն Մովսեսյանը նշել է, որ հայկական կողմն աշխարհի տարբեր ԱԷԿ-երում արտակարգ իրավիճակների մասին տեղեկատվություն է ստանում, որի հիման վրա մշակում է ատոմային էլեկտրակայանների անվտանգության ապահովման միջոցառումների ծրագիրը և մոդելավորում իրավիճակը: