Ճապոնիայում մարտի 11-ի երկրաշարժի և ցունամիի զոհերի թիվը հասել է 15 019 հոգու: Այդ մասին հաղորդում է Ճապոնիայի ազգային ոստիկանական վարչությունը: Ոստիկանության տվյալներով, երկրի վեց պրեֆեկտուրաներում անհետ կորած է համարվում 9506 մարդ: 18 շրջաններում էվակուացվածների համար կազմակերպված 2 400 ժամանակավոր ապաստարաններում մինչև օրս 114 հազար մարդ է մնում:

Աղետի արդյունքում Ճապոնիային հասցված վնասը, իշխանությունների գնահատմամբ, կգերազանցի 25 տրլն իենը (308 մլրդ դոլար): Եվս 11 տրլն իեն (133 մլրդ դոլար) կարող է գնահատվել «Ֆուկուսիմա-1» ԱԷԿ-ում վթարի հասցրած վնասը, որը ռադիոակտիվ նյութերի արտահոսք է առաջացրել շրջակա միջավայր, հաղորդում է ԻՏԱՐ-ՏԱՍՍ-ը: