Ինչպես աշխարհում, այնպես էլ Հարավային Կովկասում ուժերի ներկայիս հավասարակշռության դեպքում ղարաբաղյան հակամարտությունը կարգավորելու հնարավորություն չկա: Այդ մասին Երևանում կայացած մամլո ասուլիսում հայտնել է ԱՊՀ երկրների ինստիտուտի Կովկասի գծով փորձագետ Միխայիլ Ալեքսանդրովը: «Հակամարտության կարգավորման միակ տարբերակը կարող է ծագել Արևմուտքի լուրջ թուլացումից, ՆԱՏՕ-ի փլուզումից և Եվրասիայից ԱՄՆ-ի հեռանալուց հետո»,- ասել է ռուսաստանյան փորձագետը` ավելացնելով, որ նման հեռանկար գոյություն ունի: «Մենք տեսնում ենք, որ ՆԱՏՕ-ն իսկապես այժմ շատ բարդ դրության մեջ է, Եվրամիությունը նույնպես լավագույն վիճակում չէ, ինչպես նաև սպառնալիքի տակ է շենգենյան համաձայնագիրը»,- նկատել է Ալեքսանդրովը: Նրա խոսքով` այդ ամենը կապված է համաշխարհային տնտեսական ճգնաժամի հետ:
