Մայիսի 23-ին Ազգային ժողովի Կանաչ սրահում բացվեց գեղանկարիչ Հարություն Հարությունյանի` Արթինի գեղանկարչական գործերի ցուցահանդեսը: Ցուցահանդեսի բացմանը ներկա էին ԱԺ նախագահ Հովիկ Աբրահամյանը, պատգամավորներ, ԱԺ աշխատակազմի ներկայացուցիչներ, լրագրողներ:
Գեղանկարիչ Հարությունյանը ծնվել է Երեւանում, ավարտել է Երեւանի Փանոս Թերլեմեզյանի անվան գեղարվեստի ուսումնարանը, Երեւանի գեղարվեստաթատերական ինստիտուտը: Անդամակցել է ՍՍՀՄ նկարիչների միությանը:
Հարություն Հարությունյանի գեղանկարչական գործերը ցուցադրվել են մի շարք անհատական եւ խմբակային ցուցահանդեսներում եւ ցուցասրահներում, բազմաթիվ աշխատանքներ պահվում են մասնավոր հավաքածուներում:
Հարություն Հարությունյանը շնորհակալություն հայտնեց ԱԺ նախագահ Հովիկ Աբրահամյանին` խորհրդարանում իր աշխատանքները ցուցադրելու պատվին արժանանալու համար:
