«Ջավախք» հայրենակցական միության ղեկավար, ՀՀ ԱԺ պատգամավոր Շիրակ Թորոսյանը դրական է գնահատում Միջազգային ճգնաժամային խմբի (ICG) կողմից հրապարակված զեկույցը Վրաստանի հայաբնակ շրջանի` Ջավախքի մասին: Թորոսյանի խոսքերով, վերջին զեկույցը պարունակում է «առողջ տարրեր»:
«ICQ զեկույցում օբյեկտիվորեն քննադատության են ենթարկվում վրացական իշխանությունները՝ ջավախահայերի նկատմամբ կիրառվող քաղաքականության համար, նշվում է հայ բնակչության դժգոհությունը հայոց լեզվի կարգավիճակի բացակայության, սոցիալ-տնտեսական խնդիրների վերաբերյալ և կոչ անում քայլեր ձեռնարկել իրավիճակը կարգավորելու համար»,- նշել է Շիրակ Թորոսյանը:
Միևնույն ժամանակ հայրենակցական միության ղեկավարը նշել է զեկույցում մի շարք բացթողումների առկայությունը: ICQ-ն մասնավորապես չի շոշափել տարածաշրջանի հայ ակտիվիստների զանգվածային ձերբակալությունները և նրանց քաղաքական հետապնդումները:
Թորոսյանը նշել է, որ ICQ զեկույցը հայկական կողմի հաջողությունն է, որը ակտիվացրել է ջանքերը միջազգային հարթակում: «Միջազգային կազմակերպությունների դիրքորոշման մեջ նկատվում է որոշակի առաջխաղացում: Նրանք սկսել են ավելի հաճախ անդրադառնալ Ջավախքի իրավիճակին և հայերի խնդիրներին»,- ասել է պատգամավորը:
