Մայիսի 24-ին ՀՀ սփյուռքի նախարար Հրանուշ Հակոբյանն ընդունեց ՄԱԿ-ի Պարենի համաշխարհային ծրագրի (ՊՀԾ) Միջին Արևելքի, Կենտրոնական Ասիայի և Արևելյան Եվրոպայի տարածաշրջանային տնօրեն Դալի Բելգասմիին և ՊՀԾ հայաստանյան գրասենյակի ղեկավար Մարիա Լուկյանովային:
Ողջունելով հյուրերին` նախարար Հ.Հակոբյանը ներկայացրեց ՀՀ սփյուռքի նախարարության կողմից մայիսի 26-28 Երևանում կազմակերպվող «Սփյուռքի հեռանկարները գլոբալացվող աշխարհում» միջազգային համաժողովի նպատակները: Համաժողովին մասնակցելու են Սփյուռք ունեցող պետությունների համապատասխան պետական մարմինների ղեկավարներ և ներկայացուցիչներ, ինչպես նաև այդ պետությունների` ՀՀ-ում հավատարմագրված դիվանագիտական ներկայացուցչությունների ղեկավարներ:
Բարձր գնահատելով ՀՀ սփյուռքի նախարարության գործունեությունը` Դ.Բելգասմին ողջունեց համաժողովի կազմակերպման գաղափարը:
Հանդիպման ընթացքում քննարկվեցին Սփյուռքի հիմնախնդիրներին, պետություն-սփյուռք հարաբերությունների զարգացմանն առնչվող հարցեր: Անդրադարձ կատարվեց նաև ՊՀԾ կողմից իրականացվող դպրոցական սնունդ ծրագրին: