Երեւանի Կաթողիկե Սուրբ Աստվածածին եկեղեցուն հարակից Աղայան 13 շենքի բնակիչները երեկ բակում հավաքված բողոքում էին իրենց շենքին շատ մոտ իրականացվող շինարարության դեմ, հաղորդում է «Հայոց աշխարհը»։

Ութ դար վաղեմության Սուրբ Կաթողիկեին կից կառուցվում են նոր՝ Սուրբ Աննա եկեղեցին եւ կաթողիկոսի երեւանյան նստավայրը։ Սուրբ Աննան նախատեսվում է կառուցել 37 մետր բարձրությամբ, իսկ կաթողիկոսի նստավայրը եռահարկ է լինելու։ Շինարարությունը հովանավորում է սփյուռքահայ բարերար Հրայր Հովնանյանը։

Բնակիչները դժգոհում են, որ նախատեսվող շինությունները ոչ միայն կփակեն ճանապարհը ավտոմեքենաների համար, այլեւ կզրկեն իրենց բնակարանները արեւի բնական լույսից։

Դեռ ապրիլի 21-ին «Չիլինգարյան Դիզայն Քնսթրաքշն» ընկերությունը, որը զբաղվում է սբ.Աննայի հոգևոր համալիրի շինարարական աշխատանքներով, արձագանքել է եկեղեցականների, քաղաքագետների և պարզապես մայրաքաղաքի բնակիչների վրդովմունքին և այն մտավախություններին, որ նոր եկեղեցական համալիրի կառուցումը կփչացնի Սուրբ Կաթողիկե եկեղեցու տեսքը:

«Սուրբ Աննա եկեղեցու շինարարական աշխատանքները ամբողջապես համաձայնեցված են Քաղաքաշինության պետական տեսչության և Հուշարձանների պահպանության գործակալության հետ: Հաշվի են առնված եկեղեցիների տարածքներին բնորոշ բոլոր առանձնահատկությունները, ներառյալ այն փաստը, որ եկեղեցին կառուցվել է նախկին սրբավայրի հիմքի վրա: Շինարարության ընթացքում կատարվել է տարածքի հետազոտություն և պեղումներ», - նշում է «Չիլինգարյան Դիզայն Քնսթրաքշն» ընկերության հիմնադիր տնօրեն Գարիկ Չիլինգարյանը:

Շինարարական աշխատանքներն սկսվել են մարտ ամսին, որի արդյունքում ապրիլի 1-ին հայտնաբերվել է պատի մեջ ներկառուցված XVII դ. խաչքար, ինչպես նաև XVIIդ. պատնեշի բեկոր: Հայտնաբերվել է նաև 17-րդ դարի բազիլիկի պատի մի դրվագ, որը պայթեցվել է 1936 թվականին ստալինյան բռնադատումների ժամանակ և նույն դարաշրջանի թվագրությամբ երեք կարաս: