Կովկասի ինստիտուտի տնօրեն Ալեքսանդր Իսկանդարյանը հոռետեսորեն է վերաբերվում նրան, որ Մոսկվան կապված է Թբիլիսիում վերջին իրադարձությունների հետ: Նրա խոսքերով, վրացական ընդդիմությանը ոչինչ չի հաջողվել, ցույցերին քիչ մարդ է եղել: «Սահակաշվիլու ռեժիմին ոչինչ չի սպառնում, նույնիսկ հաշվի առնելով այն, որ նրա վարկանիշը երկրում շատ ցածր է»,- մամլո ասուլիսում հայտարարել է փորձագետը: Նա նաև նշել է, որ ընդդիմությունն ավելի կթուլանա իշխանությունների հետապնդման արդյունքում:
Ինչ վերաբերվում է Վրաստանի և Սահակաշվիլու նկատմամբ Արևմուտքի վերաբերմունքին` Իսկանդարյանն ասել է, որ այդ առիթով կհնչեն տարբեր կարծիքներ, սակայն Արևմուտքի վերաբերմունքը պայմանավորված կլինի տարածաշրջանում Վրաստանի կարևոր աշխարհաքաղաքական դերով: Միաժամանակ Իսկանդարյանը նշել է, որ ամեն դեպքում Վրաստանի վարկանիշը կընկնի: Ուժեղ իշխանությունը, նրա խոսքերով, պետք է ձգտի փոխզիջման: «Իշխանությունը, որն արձագանքում է ուժով, թույլ իշխանություն է»,- ասել է Իսկանդարյանը:
