Ամենայն Հայոց Կաթողիկոս Գարեգին Երկրորդը հունիսի 10-15-ը Վրաստան կատարելիք իր այցի ժամանակ կհանդիպի Համայն Վրաց Պատրիարք-Կաթողիկոս Եղիա Երկրորդի հետ: Այդ մասին «Պիրվելի» գործակալությանն է հաղորդել Վրաց Ուղղափառ եկեղեցու արտաքին կապերի բաժնի ղեկավար, Զուգդիդիի և Ծաիշայի միտրոպոլիտ Գերասիմ Շարաշենիձեն:
Այցի շրջանակներում կդիտարկվեն ՎՈՒԵ և ՀԱԵ փոխհարաբերությունների հարցեր: Կկայանա նաև ՀԱԵ առաջնորդի այցելությունը հայաբնակ Ջավախքի շրջան:
«Ներկա փուլում չեմ կարող որևէ բան ասել եկեղեցիների վիճելի հարցերի մասին: Պատվիրակության ժամանելուն պես, երբ բանակցությունները սկսվեն, կսահմանվեն նաև քննարկվելիք հարցերը: Ինչ վերաբերում է իրավաբանական կարգավիճակի որոշմանը, դա պետության արտոնությունն է: Վրաց պատրիարքարանն իր կողմից ոչինչ չունի այն բանի դեմ, որպեսզի ինչպես հայկական, այնպես էլ կաթոլիկ և հուդայական համայնքները Վրաստանում իրենց կարգավիճակը ստանան»,- հայտնել է միտրոպոլիտ Գերասիմը:
Այս այցը վերջին 100 տարիների ընթացքում Ամենայն Հայոց Կաթողիկոսի կողմից Վրաստան կատարած առաջին այցն է, հաղորդում է Բլագովեստ Ինֆոն:
