Միջազգային կառույցներն արել են ամեն ինչ, որպեսզի մեկուսացնեն Ադրբեջանի հայ փախստականներին` նրանց չտալով որևէ կարգավիճակ: Այդ մասին Երևանում կայացած մամլո ասուլիսում ասել է Ադրբեջանի հայերի լիազորված ներկայացուցիչների համագումարի կազմկոմիտեի անդամ Մարիամ Ավագյանը: Նրա խոսքով, միջազգային կառույցները դիտարկել են միայն բնակարանին վերաբերող, սոցիալ-տնտեսական դրության հարցերը, սակայն մյուս հարցերում հայ փախստականների իրավունքները ոտնահարվել են: «Նրանք անգամ չեն կարող նշել հայ փախստականների իրական թիվը»,- նշել է նա:
Դրա հետ մեկտեղ Մարիամ Ավագյանը նկատել է, որ Հայաստանի իշխանությունները բանը հասցրել են նրան, որ հայ փախստականները չեն կարող մասնակցել ղարաբաղյան հակամարտության կարգավորման գործընթացին և չեն կարող գործել որպես քաղաքական ուժ: Այս համատեքստում Ավագյանն ընդգծել է փախստականների հարցի քաղաքականացման անհրաժեշտությունը, ինչը նրանց իրավունքների համար պայքարն ավելի արդյունավետ է դարձնում:
