Հունիսի 12-ին Երևանում տեղի կունենա հայկական ազգային ուտեստների համտես-ցուցահանդես: Այդ մասին Երևանում կայացած մամլո ասուլիսում հայտնել է «Հայկական խոհարարական ավանդույթների պահպանում և զարգացում» հասարակական կազմակերպության նախագահ Սեդրակ Մամուլյանը: Նրա խոսքով, միջոցառումը կկայանա Երևանի «Էրեբունի» արգելոց-թանգարանում ժամը 11:00-17:00` «Տասներեք հայկական ավանդական տոների ազգային ավանդական ուտեստներ» խորագրով: Ընդ որում, Մամուլյանը հաղորդել է, որ միջոցառման ընթացքում կներկայացվեն նաև ասորական ուտեստներ: «Համտես-ցուցահանդեսի ժամանակ իրենց վարպետությունը կցուցադրեն նաև Վրաստանից և Իրանից ժամանած խոհարարներ»,- ասել է նա` ավելացնելով, որ ներկայացված ուտեստների գները խորհրդանշական բնույթ են կրելու: Նրա խոսքով, մուտքը համտես-ցուցահանդեսին անվճար է լինելու: «Այս միջոցառումից ստացված ողջ հասույթը մենք մտադիր ենք փոխանցել որևէ հայկական դպրոցի»,- նկատել է Մամուլյանը:

Կազմակերպության տնօրեն Գարիկ Գևորգյանը հաղորդել է, որ ընթացիկ տարում իրենք պատրաստվում են հայկական խոհանոցին նվիրված ևս մի շարք միջոցառումներ անցկացնել: «Հուլիսի 14-ին Սարդարապատում տեղի կունենա տոլմայի փառատոն, սեպտեմբերի 17-18-ին Ախթալայում` խորովածի փառատոն, իսկ հոկտեմբերի 15-ին մենք մտադիր ենք խոհարարների համահայկական փառատոն անցկացնել»,- հաղորդել է նա` ավելացնելով, որ 2012 թվականին կազմակերպությունը մտադիր է նաև հացի փառատոն անցկացնել: