Հունիսի 9-ին ՀՀ մշակույթի նախարար Հասմիկ Պողոսյանն ընդունել է ՀՀ-ում Մեքսիկայի Միացյալ Նահանգների արտակարգ և լիազոր դեսպան Ալֆրեդո Պերես Բրավոյին և դեսպանության մշակութային կցորդ Հենոք դե Սանտյագոյին, ովքեր Հայաստան են ժամանել ՀՀ-ում առաջին անգամ Մեքսիկայի մշակույթի օրերի անցկացման կապակցությամբ:
Նախարարը այդ առթիվ շնորհավորել է հյուրերին և օրերի անցկացումը կարևոր քայլ է համարել մշակութային հարաբերությունների զարգացման գործում: Նախարարն ընդգծել է նաև, որ «Հայաստանի Հանրապետության Կառավարության և Մեքսիկայի Միացյալ Նահանգների Կառավարության միջև մշակույթի, կրթության, գիտության, սպորտի և երիտասարդության հարցերի բնագավառում 2011-2014 թթ.» համագործակցության ծրագրի ստորագրումը կամրապնդի հայ-մեքսիկական իրավապայմանագրային դաշտը և հիմք կհանդիսանա մշակութային փոխանակումների համար:
Հանդիպման ավարտին դեսպան Ալֆրեդո Պերես Բրավոն շնորհակալություն հայտնեց Մեքսիկայի մշակույթի օրերի` թեպետ կարճատև, սակայն հետաքրքիր մեկնարկի ու անցկացման համար և հույս հայտնեց, որ նման սկիզբն անշուշտ խոստումնալից է ապագա համագործակցության համար ևս:
