Հունիսի 12-ին «Արամ Խաչատրյան» համերգասրահում կայացավ Արամ Խաչատրյանի անվան դաշնակահարների միջազգային մրցույթի երրորդ փուլը, որի արդյունքում հայտնի դարձան հաղթողները: Առաջին մրցանակին արժանացավ Պենգ Ցաոն Չինաստանից, երկրորդ մրցանակը կիսեցին Ժորա Սարգսյանն ու Լիլիթ Գրիգորյանը Հայաստանից, իսկ երրորդ մրցանակին արժանացավ Սոնա Արշակյանը Ռուսաստանից: Երրորդ փուլի մասնակցի դիպլոմի է արժանացել Անահիտ Դիլբարյանը Հայաստանից:
Արամ Խաչատրյանի անվան միջազգային մրցույթը, որին մասնակցելու համար այս տարի Երևան են ժամանել 36 դաշնակահար և 11 կոմպոզիտոր, ընդգրկում է երաժիշտներ Հայաստանից, ԱՊՀ երկրներից, Եվրոպայից, ԱՄՆ-ից, Կանադայից, Ավստրալիայից, Լիբանանից, Իսպանիայից, Վրաստանից, Չինաստանից, Կորեայի Հանրապետությունից և Դոմինիկյան Հանրապետությունից: Մրցույթի կազմակերպիչներն են ՀՀ մշակույթի նախարարությունը «Արամ Խաչատրյան - մրցույթ» մշակութային հիմնադրամը և Երևանի Կոմիտասի անվան պետական կոնսերվատորիան: Գլխավոր գործընկերն է ԱՊՀ-Հումանիտար համագործակցության միջպետական հիմնադրամը: Մրցույթի պաշտոնական փակումը տեղի է ունենալու հունիսի 13-ին «Արամ Խաչատրյան» համերգասրահում:
