Արարատբանկ ՓԲԸճն Հայաստանի Կենտրոնական բանկից ստացավ «Diners Club International» միջազգային վճարահաշվարկային համակարգում մասնակցության թույլտվություն: Սույն որոշումն ընդունվեց հունիսի 10-ին ՀՀ Կենտրոնական բանկի Խորհրդի նիստում:
Ինչպես նշվում է բանկի լրատվական բաժնի հաղորդագրության մեջ, աշխարհում պրեմիում դասի Diners Club միջազգային վճարային համակարգում մասնակցության գործընթացը Արարատբանկը սկսել էր դեռևս 2010թ. տարեվերջին, և արդյունքում բանկը դարձավ այս հեղինակավոր կազմակերպության բացառիկ ներկայացուցիչ Հայաստանում` հնարավորություն ստանալով սպասարկելու Diners Club- ի` ճանաչված համաշխարհային ապրանքանիշի պլաստիկ քարտերից և էլեկտրոնային վճարման ամենատարբեր ծառայություններից օգտվող քարտապաններին:
Մինչև 2011թ. ավարտը բանկը կավարտի համապատասխան ծրագրային ապահովման ներդրման և Diners Club-ի համաշխարհային ցանցին բանկի բանկոմատների ու POS-տերմինալների միացման աշխատանքները:
Diners Club համակարգը հիմնադրվել է 1950 թվականին, այն բարձրակարգ ֆինանսական ծառայություններ է մատուցում աշխարհի ավելի քան 185 երկրներում, շուրջ 675 հազ. բանկոմատների և կանխիկացման կետերի միջոցով։