Հայաստանի գործողություններն անհասկանալի են Ադրբեջանի նախագահ Իլհամ Ալիևին: Ինչպես հաղորդում է ԱՊԱ-ն, այդ մասին ասել է Ադրբեջանի նախագահ Իլհամ Ալիևը կառավարության նիստի ժամանակ: Նա հայտարարել է, որ Հայաստանն արդեն 20 տարի չի ցանկանում փոխել ստատուս քվոն: Ալիևը նշել է, որ Սոչիի հանդիպման ժամանակ Ադրբեջանն իբր միանշանակ ընդունել է Մադրիդյան սկզբունքները, բայց Հայաստանը խուսափում է դա անելուց, իսկ ադրբեջանական կողմը սկսել է կառուցողականություն հանդես բերել:
Ադրբեջանի նախագահը բաց չի թողել առիթը և ասել է, որ վերջին տարիներին միջազգային հանրության ակտիվացման հիմնական պատճառներից մեկը «հզոր ադրբեջանական պետության և նրա բանակի առկայությունն է»:
ՌԴ, Ադրբեջանի և Հայաստանի նախագահների Կազանում կայացած գագաթաժողովն ավարտվեց առանց Լեռնային Ղարաբաղի հակամարտության կարգավորման շուրջ հիմնարար սկզբունքների մասին պայմանավորվածությունների ձեռքբերման: Ինչպես հաղորդում է ՌԻԱ Նովոստին, կողմերն առաջընթաց են արձանագրել այդ նպատակին հասնելու ճանապարհին: «Պետությունների ղեկավարներն արձանագրել են փոխըմբռնման ձեռքբերումն այն հարցերի շուրջ, որոնց լուծումը նպաստում է հիմնարար սկզբունքներին համաձայնելու համար պայմանների ստեղծմանը»,- ասվում է նախագահների հայտարարության մեջ: Փաստաթղթում ասվում է, որ հանդիպման մասնակիցները դիտարկել են հիմնարար սկզբունքների նախագծի համաձայնեցման նպատակով իրականացվող աշխատանքների ընթացքը:
