Հայ ազգային կոնգրեսը փորձում է հանրության շրջանում այն պատկերացումը ստեղծել, թե իշխանությունների ու ՀԱԿ-ի բանակցությունների արդյունքում երկրում երկիշխանություն է ձևավորվել: Այդ մասին Երևանում կայացած մամլո ասուլիսում հայտարարել է ՀՀԿ խորհրդարանական խմբակցության ղեկավար Գալուստ Սահակյանը: Այդ առնչությամբ նա հեգնանքով նշել է, որ ՀԱԿ-ը ցանկանում է իր հանրահավաքներում գլուխ գովել, թե «եկանք, տեսանք, հաղթեցինք»:
Ընդ որում, նա հավելել է, որ իշխանությունները ոչ թե պատվիրակություն են կազմավորել, այլ աշխատանքային խումբ, որը մտադիր է քննարկել երկրի առջև ծառացած խնդիրներն ու լուծման ուղիները: «Իշխանությունները բանակցում են ոչ միայն ՀԱԿ-ի, այլ նաև այլ խորհրդարանական ու ոչ խորհրդարանական քաղաքական ուժերի հետ»,-հայտարարել է Սահակյանը՝ նշելով, որ պետք չէ հանրահավաքներում հանդես գալ սանձարձակ հայտարարություններով, երբ բանակցություններ են ընթանում: