Օգոստոսի 12-ին Արցախի Հանրապետության պաշտպանության նախարար Մովսես Հակոբյանը հանդիպեց Արցախում գործող ԶԼՄ-ների հետ, ասուլիսը նվիրված էր ԼՂՀ անկախության հռչակման 20-րդ տարեդարձին:
Ռազմական գերատեսչության ղեկավարը համառոտ անդրադարձավ անցած երկու տասնամյակների ընթացքում Պաշտպանության բանակի ունեցած ձեռքբերումներին, նրա դերին ու վաստակին անկախության պահպանման և ամրապնդման գործում, ներկայացրեց հետպատերազմյան բանակաշինության առանձնահատկություններն ու ներկա ժամանակահատվածում իրականացվող գործընթացները:
«Անցած տարի և այս տարվա առաջին կիսամյակը զինված ուժերում հայտարարված է բարեփոխումների տարի, և այսօրվա բանակի մարտական պոտենցիալը ավելացել է մոտավորապես 20 տոկոսով, որը բոլոր տարիների համեմատ մեր ամենամեծ առաջընթացն է, և սա շարունակական է լինելու»,- ասել է Արցախի պաշտպանության նախարարը:
Նախարարը նաև շեշտեց, որ Արցախի զինված ուժերը մշտապես գտնվում են մարտունակ վիճակում և պատրաստ են արժանի հակահարված տալ թշնամու յուրաքանչյուր ոտնձգության:
