Մի խումբ բնապահպաններ տարբեր էկոլոգիական նախաձեռնություններից բաց նամակով դիմել են այս օրերին Հայաստանում գտնվող աշխարհահռչակ ամերիկահայ ռոք երաժիշտ, հասարակական գործիչ Սերժ Թանկյանին:
Նամակում նրանք մտահոգություն են հայտնում Հայաստանում ստեղծված բնապահպանական վիճակի վերաբերյալ՝ գրելով. «Այսօր զարգացման անվան տակ ոչնչացվում են հսկայական լեռնաշղթաներ`ոսկու, մահաբեր ուրանի, մոլիբդենի, պղնձի, երկաթի, արծաթի և այլ մետաղների կորզման, գերշահույթ ստանալու նպատակով: Զարգացման կամ աշխատատեղերի բացման նպատակով հենց հայի ձեռքերով հօդս են ցնդում կուսական վայրի անտառներ` դարձնելով մեր երկիրը ամայի, անմարդաբնակ ու անշունչ»:
Բնապահպանական թեման զարգացնելով՝ նամակի հեղինակները մատնանշում են Առողջապահության համաշխարհային կազմակերպության կողմից 2005թ. հրապարակված մի զեկույց, որտեղ Հայաստանը ԱՊՀ երկրների շարքում անոմալ ծնունդների թվով երկրորդն է Ղրղզստանից հետո:
Բնապահպանները Թանկյանից խնդրում են զարկ տալ հայ հասարակությանը, կառավարությանը, սփյուռքահայությանը իր կոչերով, երգերով, ոգեշնչող խոսքով.
«Զարկ տուր, թող հայ մարդը դադարի կտրել այն ճյուղը, որի վրա նա նստած է»: