ՀՀ փոխվարչապետ, տարածքային կառավարման նախարար Արմեն Գևորգյանի մոտ այսօր կայացած խորհրդակցությանը քննարկվեցին ոռոգման համակարգի ընթացիկ իրավիճակին վերաբերող հարցեր: Ինչպես հաղորդում է ՏԿՆ մամլո ծառայությունը, «Հայաստանի մարտահրավեր հիմնադրամ -Հայաստան» ՊՈԱԿ-ի գլխավոր գործադիր տնօրեն Արա Հովսեփյանը տեղեկություններ ներկայացրեց երրորդ կարգի ջրանցքների և պոմպակայանների վերականգնման ծրագրերի ընթացքի վերաբերյալ: Զեկուցվեց, որ արդեն ավարտին են մոտենում Նոյեմբերյանի պոմպակայանի ջրառն ապահովող Դեբեդի պատվարի վերակառուցման աշխատանքները: Ծրագրով վերականգնված բոլոր պոմպակայանները փորձարկվում են` ի հայտ եկող թերությունները շտկելու համար:
Փոխվարչապետը հանձնարարեց արագացնել այդ աշխատանքները և վերականգնված պոմպակայանները հանձնել շահառուներին:
Խորհրդակցության ընթացքում ՏԿՆ ջրային տնտեսության պետական կոմիտեի նախագահ Անդրանիկ Անդրեասյանը ներկայացրեց ոռոգման շրջանի ընթացքը: Նա վստահեցրեց, որ գյուղացիական տնտեսությունների պահանջարկն ընդհանուր առմամբ բավարարվում է: Աշխատանքներ են իրականացվում վարձավճարների հավաքագրումների պատշաճ մակարդակի ապահովման ուղղությամբ: Սևանա լճից ջրբացթողումները ևս կատարվում են ըստ սահմանված ծավալների: Փոխվարչապետը կոմիտեի նախագահին հանձնարարեց ուշադրության կենտրոնում պահել ոռոգման անխափան կազմակերպման և վարձավճարների հավաքագրումների ընթացքը:
