«Ժառանգության» դեմ տեղեկատվական դաշտում արշավ է սկսվել: Այս մասին ասաց «Ժառանգության» պատգամավոր Արմեն Մարտիրոսյանն այսօր հրավիրած մամուլի ասուլիսում: Ըստ ընդդիմադիր պատգամավորի, դրա նպատակն է՝ համոզել հասարակայնությանը և «Ժառանգության» ղեկավարներին, որ կուսակցությունը չի կարողանա անդամակցել հաջորդ գումարման խորհրդարանին:
Արմեն Մարտիրոսյանը զուգադիպություն չի համարում նախօրեին կազմավորված ընտրատարածքային ընտրական հանձնաժողովներից իրենց ներկայացուցիչների դուրս բերումը և տեղեկատվական արշավը:
Հիշեցնենք, որ ընտրատարածքային ընտրական հանձնաժողովները նախորդների նման կուսակցական սկզբունքով են կազմավորվել:
«Այնտեղ կան բոլոր նրանք, ովքեր կային նախկինում՝ բացի «Ժառանգությունից»: Ըստ Արմեն Մարտիրոսյանի, դրանով իրենց կուսակցությունը կորցրել է կարևոր լծակ ընտրությունների ժամանակ հնարավոր խախտումներին հակազդելու առումով: Բանախոսը առանձնացրեց նաև ընդդիմադիր ՀԱԿ-ին և այն ուժերին, որոնք պրոֆեսիոնալ հանձնաժողովերի ձևավորմանն էին կողմ՝ հորդորելով նրանց երեսպաշտություն չանել ու չդժգոհել արդյունքներից: «Նրանք պետք է, որ կանխատեսեին այս իրավիճակը»,-ասել է պատգամավորը:
