Մերձբալթյանի երկրների և Գերմանիայի ԱԳՆ ղեկավարների ամենամյա հանդիպման օրակարգում չի քննարկվել ղարաբաղյան հակամարտության հարցը` չնայած որոշ ԶԼՄ-ներում տարածված տեղեկատվությանը: Այդ մասին PanARMENIAN.Net-ի թղթակցին հայտնել է Լիտվայի ԱԳՆ ղեկավար, ԵԱՀԿ գործող նախագահ Աուդրոնյուս Աժուբալիսի մամլո քարտուղարը:
«Նախարարների հանդիպման ընթացքում քննարկվել են Շենգենյան գոտում տեղեկատվական դաշտի արդիականացման հարցերը: Հիմնական քննարկվող հարցերից է եղել տարածաշրջանում միջուկային անվտանգության և Մերձդնեստրյան հակամարտության հարցը»,- ասել է մամլո քարտուղարը:
Ավելի վաղ որոշ ԶԼՄ-ներ տեղեկատվություն են տարածել այն մասին, որ Լիտվայի ԱԳՆ ղեկավար Աուդրոնյուս Աժուբալիսը քննարկելու է ղարաբաղյան հակամարտության կարգավորման հարցը Մերձբալթյան երկրների և Գերմանիայի ԱԳՆ ղեկավարների ամենամյա հանդիպման ընթացքում:
